fbpx
غوص سكوبا

أشهر 10 خرافات عن رياضة الغوص

الغوص يعتبر واحد من أكثر الرياضات متعة، من خلال الغوص هتقدر تستكشف عالم جديد، عالم بملئ بالحياة والألوان المختلفة، الطبيعة الجذابة تحت سطح البحر تستاهل فعلا  إنك تجرب الغوص علشان تتعرف على العالم ده. مؤخرا زاد عدد الناس المهتمة بالغوص وكتير منهم حابين يجربوا لكن في بعض الخرافات والشائعات حوالين الغوص هي اللي منعاهم إنهم يجربوا. الخرافات دي في منهما اللي سببها السينما زي مثلا خرافة إن القروش بتاكل الإنسان، ومنها الخرافات اللي بينشرها بعض الناس عن جهل أو عن عدم علم كافي بالغوص. في المقال هتكلم عن 10 خرافات متعلقة بالغوص وهوضح المعلومة الصحيحة لكل واحدة منهم.

القروش ستأكلنا

بما إننا اتكلمنا في المقدمة عن القروش فخلينا نبدأ بأول خرافة والمتعلقة بالقروش، وهي إننا “لو غطسنا القروش هتاكلنا”

الحقيقة: القروش مابتكلش لحم الإنسان، والهجمات اللي بتحصل مالهاش علاقة بالأكل ولكن ليها علاقة بعدم وعينا بطبيعة القروش وبتحصل كمان بسبب التعامل الخاطئ مع القروش وعدم فهمنا لطبيعة الكائن ده. القرش مش كائن مؤذي بل لالعكس هو كائن مفيد جدا لحدوث التوازن البيئي ولكن بسبب الممارسات الخاطئة من البشر واللي بتؤدي إلى رد فعل عدواني من القروش، ولكن في العموم هما مش كائنات مؤذية والدليل إن في بعض الأماكن بتعتمد على القروش في السياحة الخاصة بيها عن طريق إن الناس بتروح الأماكن دي علشان تغطس مع القروش، فلو كان القرش خطر ماكانتش الناس دي هتقدر تغطس معاه.

لازم أكون سباح ماهر علشان أعرف أغطس.

الحقيقة: مش لازم تكون سباح أوليمبي علشان تقدر تغطس، لو متعلم أساسيات السباحة هتقدر تغطس بكل سهولة، وحتى لو مابتعرفش تعوم خالص في قدامك فرصة إنك تغطس عن طريق إنك بتعمل غطسة تجريبية، دي إنت مش بتتعلم الغوص ولكن بتجرب والغطسة دي مش محتاجة إنك تكون بتعرف تعوم، أما لو عايز تتعلم غوص فمحتاج تكون بتعرف تعوم علشان في خلال الكورس هتعوم 200 متر، ولكن ال 200 متر دول مش في وقت محدد يعني مش لازم تكون سباح قوي، إنت بس لو عندك الأساسيات وبتعرف تعوم هتقدر تعمل ال 200 متر بكل سهولة.

محتاج تشتري معدات كتير غالية علشان تبدأ تتعلم الغوص.

الحقيقة: الغوص بيحتاج كتير من المعدات اللي بنستخدمها تحت الماية، لكن إنت مش محتاج تشتري أي قطعة من المعدات دي لأن مراكز الغوص بيكون عندها بالفعل المعدات اللي بيتم تأجيرها للناس اللي بتغطس. فلو انت عايز تبدأ تتعلم مركز الغوص بيوفرلك العدة دي، وحتى لو هتكمل ومش عايز تشتري معدات بردو تقدر تأجر المعدات من مركز الغوص بعد ما تخلص كورساتك وعايز تغطس.

لازم أنزل أعماق بعيدة علشان أقدر أشوف حاجات كويسة واستمتع بالغطسة.

الحقيقة: الاستمتاع مالهوش أي علاقة بالعمق، ناس كتير من اللي بيجربوا الغوص لأول مرة بيكونوا فاكرين إننا لازم ننزل تحت لعمق كبير علشان نقدر نتفرج على الشعاب المرجانية والأسماك ولكن المعلومة دي غير صحيحة، إحنا ممكن من على عمق متر واحد نتفرج على الشعاب المرجانية والأسماك زي ما موجود هنا في دهب مثلا، عندنا الشعاب المرجانية في أماكن كتير بتبدأ تقريبا من على عمق متر واحد  فاحنا مش محتاجين ننزل لعمق علشان نتفرج، لو الغطسة بتاعتنا عملناها على عمق 5 متر بس هنقدر نستمتع ونتفرج على حاجات كتير مختلفة في العمق البسيط ده.

لازم تكون صغير في السن و شخص رياضي علشان تقدر تغوص.

الحقيقة: أكيد لو انت رياضي و صحتك كويسة ده هيساعدك كتير في الغوص بس ده مش معناه إنك لو كبير في السن أو مش رياضي ماينفعش تمارس الغوص. طالما مش عندك أي مشاكل صحية تعوقك عن الغوص فانت تقدر تمارس رياضة الغوص.

علشان تغوص لازم تكون عايش بالقرب من البحر أو المحيط.

الحقيقة: مفيش شك إنك لو في مكان قريب من البحر أو المحيط ده هيسهل عليك كتير إنك تغوص ولكن لو مفيش بحر قريب منك إنت بردو تقدر تجرب الغوص. بعض الأماكن البعيدة عن البحر بيقدموا جزأ من الكورس في حمام السباحة، بعض الغطسات في الأول بتكون في حمام السباحة، بيتعلم المتدربين بعض الأساسيات وبعد كده بيتم تنظيم رحلات للأماكن اللي فيها بحر يكملوا باقي الكورس هناك.

لو عملت سنوركل مش محتاج أجرب الغوص.

الحقيقة: طبعا السنوركل واحد من الحاجات الممتعة، إنك تتفرج على الشعاب المرجانية والأسماك من فوق ده ليه متعة أكيد، ولكن ده مش زي ماتكون إنت كلك تحت الماية بالقرب من الأسماك والشعاب المرجانية وبتتابع الحياة البحرية والمناظر الخلابة من تحت الماية.

هحس بألم في الأذن لو جربت الغوص

الحقيقة: قابلت أكتر من حد بيقولي أنا بعرف أعوم ولما بجرب أغطس مع نفسي -يقصد لما بيجرب يعمل Freedive-بحس بوجع في الأذن وده مخليني خايف إني أجرب الغوص. الموقف ده بيحصل لأن الشخص زي ما قال بيجرب مع نفسه وده غلط، لأنه مش عارف إزاي يتعامل مع الأذن تحت الضغط، لو عارف التكنيك الصحيح اللي هيتخلص بيه من الضغط مش هيكون في أي إحساس بالألم في الأذن. عندنا في الغوص في حاجة إسمها المعادلة Equalizationودي بنعلمها للناس اللي بتجرب الغوص أو للناس اللي بتتعلم، المعادلة دي ببساطة طريقة بتخلينا نقدر نتغلب على الضغط اللي بيأثر على الفراغات الموجودة في الأذن وبالتالي مابيكونش في أي إحساس بالألم.

أعلى 7 الغوص الخرافات ضبطت

عندي بعض المشاكل الصحية اللي تمنعني من الغوص.

الحقيقة: قبل ما بنجرب الغوص في بعض الأوراق اللي بنحتاج نملاها واللي منها حاجة إسمها Medical Statement ودي عن طريقها بنتأكد إنك مش عندك أي مشاكل صحية تعوقك عن الغوص، طيب هل لو إنت عندك أي مشكلة صحية من اللي مكتوبة في الورقة، ده معناه إنك مينفعش إنك تمارس الغوص؟ الإجابة لا. ليه لا، علشان في بعض المشاكل الصحية اللي بتكون موجودة في الورقة الدكتور المتخصص بعد ما بيكشف على الشخص بيسمحله عادي بالغوص، فالمفروض لو في أي مشكلة قبل ما تقرر إذا كان  ينفع تغوص ولالا هي إنك تروح للدكتور وهو اللي بيقرر.

وممكن تراجع المقال ده مفيد في موضوع المشاكل الصحية 

الغوص رياضة خطيرة.

الحقيقة: الغوص بشكل عام هو رياضة آمنه لو اتبعت قواعد الأمان والسلامة، الغوص زي سواقة العربية، لو ماشي عالسرعة المحددة واتبعت وقواعد الأمان والسلامة هتكون في أمان والعكس صحيح. طبعا في بعض الغطسات اللي بتكون فيها درجة الخطورة عالية  زي الغطس في الأماكن المقفولة – كهوف أو مراكب غرقانه – أو الغوص في أعماق بعيدة، دي بيكون فيها خطورة وأغلب المشاكل اللي بتحصل فيها بيكون بسبب القرار غير السليم من الغطاس نفسه. لكن كشخص عادي مش محتاج إنك تجرب النوع ده من الغطسات لو انت غير مهتم بيه، إنت تقدر تجرب غطسات في عمق بسيط ومكان مفتوح وهتقدر تستمتع بالغطسة.

دي بعض الخرافات والشائعات اللي بتنتشر حول رياضة الغوص واللي زي ماوضحنا بتنتشر بسبب عدم العلم الكافي وعدم توفر المعلومات الكافية عن رياضة الغوص. بلاش نخلي الشائعات والمعلومات الغلط تبعدنا عن رياضة من أفضل الرياضات وتجربة من أحسن التجارب اللي ممكن تجربها في حياتك.

شاركونا بأرائكم؟! … إيه تاني شائعات أو خرافات سمعتها عن رياضة الغوص؟   

المصادر :

http://bit.ly/2HHfZip

http://bit.ly/2HEIkpy

http://bit.ly/2HM3vWE

http://bit.ly/2HJ19b4

http://bit.ly/2VqcamD

Ahmed Fadel

غواص محترف وشغوف بعمله، مهتم بالحياة البحرية والتصوير تحت الماء، كما يعمل مدربًا للغوص في مدينة دهب بمصر.

مقالات ذات صلة

زر الذهاب إلى الأعلى