تفسير ظهور أسماك القرش وقربها من الساحل كل عام في بعض المناطق
بناءا علي دراسه علميه تمت منذ عام يونيو ٢٠١٦ حتي يناير ٢٠١٩ علي تواجد أسماك القرش من النوع المحيطي بشعاب ألفنستون بمرسي علم، تم تسجيل نتائج عامه تؤكد سبب ظهور أسماك القرش كل عام ببعض المناطق.
السبب هو ظاهره “Philopatry” يعني أسماك القرش بتعود كل عام لنفس المنطقه بهدف رعايه الأجنه بعيدا عن الذكور في أوقات معينه وأيضا للتكاثر. يعني ايه الكلام ده؟ يعني كل سنه أسماك القرش بتظهر في توقيت معين من العام وبتكون حوامل في بطنها أجنه وعلشان هي خايفه عليهم خاصه قبل خروجهم للحياه، فأنها بتروح لبعض المناطق المحددة واللي منها بيكون قريب من الشواطيء ببضعه أميال وبتتواجد بأعداد كثيره كلها إناث.
بعدها بشهر تقريبا بتظهر الذكور معاها بعدد قليل اللي بيزيد بالتدريج بعد كده في الشهور التاليه مع ظهور أناث أخري جديده. الكلام ده تم تسجيله بوضوح في شعاب ألفنستون، حيث بدأت القروش تظهر من شهر يونيو خلال أعوام ٢٠١٦، ٢٠١٧، بينما في ٢٠١٨ ظهرت من شهر مايو، وده غالبا يرجع الي أرتفاع في درجه حراره البحر أسرع في ٢٠١٨ عن الأعوام اللي قبلها.
خلال الدراسه اللي جاري نشر نتائجها في مجله علميه دوليه، تم أستخدام تقنيات التعريف بالتصوير Photo ID اللي أكدت النتائج دي. تظهر أناث القروش بكثره في شهر أغسطس بالتحديد وتقل تدريجيا حتي نوفمبر، وده بيفسر زياده هجمات القرش علي الأنسان في هذا الشهر بالتحديد.
من النتائج نقدر نقول أن نفس الظاهره دي بتحصل في باقي أنواع قروش البحر المفتوح في بعض الأماكن زي القرش الماكو في العين السخنه وسفاجا وشمال مرسي علم، القرش النمر في سان جون ومرسي علم. علشان نأكد ده، محتاجين نشتغل علي الأنواع دي في المناطق دي.
الخلاصه ورساله للجمهور….
١- لا تستغرب ظهور أسماك القرش بكثره في الصيف وتعامل مع الموقف بأنها ظاهره طبيعية تستمر لبضعه أشهر زي كده موسم هجره الطيور ، وممكن نستخدم ده في صالح البيئه البحريه المصريه.
٢- في العين السخنه…يحظر السباحه في البحر المفتوح، وتقتصر فقط بالشواطئ الضحله.
٣- مناطق الممشي البحري علي حافه الشعاب واجهه البحر المفتوح خاصه في مرسي علم، يوصي بعدم السباحه في شهر أغسطس، عدا ذلك يسمح في مسافه لا تبعد ١٠ متر عن الشعاب او تزيد عن ١٠ متر عمق، أيهما أقرب.
ملحوظه: هذا رأيي العلمي و بشكل شخصي.
مع تمنياتي للجميع بأجازة صيف سعيده وآمنه.
د/ أحمد شوقي
دكتوراه البيولوجيا البحريه
