إزاي تحسن من استهلاكك للهواء أثناء الغطس؟
أحد العقبات اللي بتقابل كتير من المبتدئين في الغطس هي استهلاك الهواء. في البداية بيكون استهلاكهم للهواء عالي واللي بيترتب عليه إن وقت الغطسة بيكون أقل. طريقة التنفس الصحيحة بتكون من أوائل المهارات اللي بنبدأ نعلمها للناس علشان يقدروا يغطسوا، ولكن إنك تكون عارف التكنيك الصحيح فقط مش كفاية، لأن في عوامل تانية ممكن تأثر عليك واللي بيترتب عليها استهلاك الهواء هيكون عالي.
الممارسة
أي حاجة عايز تتعلمها وتتقنها ومستواك يتحسن فيها لازم تمارسها بشكل مستمر. نفس القاعدة دي تنطبق على الغطس أحد الحاجات المهمة اللي محتاج تعملها علشان تحسن من استهلاكك للهواء هي الممارسةPractice makes progress كل ما غطست أكتر كل ما هتكون مرتاح أكتر في الماية واستهلاكك للهواء هيتحسن.
تنفس بعمق وببطء
النفس تحت الماية مهم يكون Deep و Slow يعني بتنفس بعمق وببطئ، إنك تتنفس بسرعة والنفس Shallow – يعني مش عميق – ده هيخلي استهلاكك للهواء هيكون أسرع وكمان بيمنع إن الهواء النقي يوصل بشكل كافي للرئة وبالتالي هتتعب بسرعة وهتحس دايما إنك محتاج تسحب هواء. كمان ماتحاولش تكتم نفسك كمحاولة منك لتقليل استهلاكك للهواء، لأن كتم النفس هيعلي نسبة ثاني أكسيد الكربون في الجسم واللي هيترتب عليه إنك هتكون عايز تتنفس أكتر.
قلل من حركتك
الحركة الكتير تحت الماية هتزود استهلاك للهواء. الحركة الكتير ليها عدة أسباب منها إنك الطفو بتاعك مش مظبوط يعني مابتعرفش تقف في الماية ثابت بدون حركة وبالتالي انت بتبذل مجهود كبير علشان تثبت واللي هيترتب عليه زيادة استهلاكك للهواء. حاجة كمان ال Fining techniques -يعني حركة رجلك- لو مش مظبوطة عندك هتلاقي نفسك بتبذل مجهود علشان تتحرك من نقطة للتانية وأوقات هتضطر تستخدم إيدك وكل الحركة الزيادة دي هيترتب عليها استهلاك زيادة للهواء، فلازم تتعلم Fining techniques علشان تقدر تتحرك بشكل أفضل وبمجهود أقل. .
الطفوية
الماية وانت بتتحرك بيكون ليها مقاومة، والمقاومة دي بتزيد كل ما كان جزأ أكبر من الجسم معرض للماية أثناء الحركة، يعني لو بتتحرك بشكل رأسي في جزأ كبير من جسمك بيتعرض للمقاومة دي وبالتالي إنت هتحتاج تبذل مجهود زيادة علشان تتحرك. وعلى العكس لو جسمك أفقي فتعرضه لقماومة الماية بيكون أقل وبالتالي الحركة هتكون أسهل لأنك هتبذل مجهود أقل.
العمق
كل ما بننزل عمق أكبر كل ما استهلاكنا للهواء بيزيد، فلو مفيش سبب أو مفيش حاجة معينة هتشوفها في المياة العميقة فالأفضل تخليك Shallow لأن إستهلاكنا للهواء بيكون أقل وبالتالي هتقدر تقعد فترة أطول.
تسريب
لو في تسريب -Leaks-في المعدات هيترتب عليه نفاذ الهواء بسرعة في حالة إن ال Leak ده كان Massive أو تسريب شديد يعني ، وبالتالي مهم تعمل فحص على المعدات اللي انت بتغطس بيها وتتأكد إن مفيش أي تسريب للهواء من أي مكان.
الحركة السريعة تحت الماية بتأثر بشكل كبير على استهلاكنا للهواء، وكمان بتمنعنا من الاستمتاع بالغطسة لأننا هنفوت حاجات كتير مش هنشوفها بسبب السرعة. فمهم إن حركتي في الماية تكون بطيئ.
طبعا في أسباب تانية بتسبب إن استهلاك الهواء يكون عالي بس بتكون حاجات عارضة مش بتحصل بشكل مستمر زي مثلا إن الشخص يكون خايف من حاجة معينه أو في تيارات تحت الماية وبالتالي هتحتاج تبذل مجهود. أما النقاط اللي فوق أي شخص عايز يظبط استهلاكه للهواء مهم إنه يشتغل عليها علشان يقدر يحسن من استهلاكه للهواء.
