من أكتر الحاجات اللي بحبها في الغوص إنه متنوع متنوع من حيث الغرض، والبيئة اللي بنغوص فيها و حتى المعدات اللي بنستخدمها. في أنواع مختلفة للغوص وكل نوع فيهم ليه هدف مختلف وله متعته الخاصة. التنوع ده بيخليك دايما متحمس وعند شغف إنك تجرب حاجات جديدة وتشوف أنواع مختلفة من الغوص. في منه اللي بيكون بغرض الترفيه وفي اللي بيكون للغرض التجاري، العلمي أو العسكري. وفي المقال ده هتكلم عن الأنواع دي علشان نوضح الفرق ما بينهم وخصوصا إن في ناس كتير بيكون عندها تساؤلات لما بيشوفوا مثلا حد نازل الماية ومعاه تانك واحد، وحد تاني نازل بأكتر من تاني، ويتفرجوا مثلا على فيلم وثائقي ويلاقوا نوع مختلف خالص لغواص نازل الماية ببدله شكلها غريب والهواء بيتم إمداده بيه من السطح. كل دي أنواع مختلفة من الغوص في المقال ده هنوضح الفرق ما با بينها وهنتكلم عن الغرض لكل نوع فيهم.
الغوص الترفيهي (Recreational Diving)
أول نوع هتكلم عنه هو الغوص الترفيهي، النوع ده من الغوص زي ما هو واضح من إسمه بيكون لغرض الترفيه، أنا نازل استمتع بجمال الطبيعة اللي تحت الماية، نازل اتفرج على الأسماك والشعاب المرجانية، أو نازل بغرض التصوير.
في الغوص الترفيهي غالبا مش بنحتاج ننزل لأعماق بعيدة -زي الغوص التجاري مثلا، أو الغوص العلمي أو الغوص الخاص بالتطبيقات العسكرية- احنا بننزل علشان نتبسط بالحرية اللي بنحسها تحت الماية، بننزل علشان نجرب متعة الاستكشاف، الإجراءات والمعدات اللي بنستخدمها بتكون أبسط شوية من الأنواع التانية للغوص.
الغوص التقني (Technicl Diving)
وأبسط تعريف ليه هو الغوص اللي بيتخطى حدود الغوص الترفيهي من حيث العمق، ووقت الغوص، وعدم إمكانية الوصول بشكل مباشر للسطح. بمعنى إننا هنا بنقعد وقت أطول، وبننزل لأماكن أكثر عمقا، و الغوص ممكن يكون في أماكن مقفولة زي كهف مثلا فالوصول للسطح بشكل مباشر بيكون غير متاح. كمان في النوع ده من الغوص خليط الغازات اللي بنتنفسه بيكون مختلف عن الغوص الترفيهي. المعدات اللي بيتم استخدامها في الغوص التقني في منها بيكون نفس المعدات اللي بتستخدم في الغوص الترفيهي ولكن في بعض الغطسات بنحتاج معدات مختلفة وكمان إسطوانات غاز أكتر وخليط مختلف. إحنا هنا في النوع ده من الغوص بننزل مثلا نستكشف أماكن عميقة زي حطام سفينة، أو استكشاف كهف.
الغوص التجاري (Commercial Diving)
الغوص مش بس بيكون لغرض الترفيه، في كمان أغراض تانية زي الغوص التجاري واللي عن طريقه بنقدر نستفيد من العناصر والمواد الطبيعية الموجودة في قاع البحار والمحيطات، وكمان عن طريقه بنقدر نقوم ببعض الإنشاءات تحت الماء، زي إمدادات خطوت البترول والغاز، وغيرها. وطبعا هنا المعدات بتختلف تمام عن النوع الأول للغوص وكمان الإجراءات الخاصة بالغوص التجاري مختلفة عن الغوص الترفيهي. في النوع ده من الغوص بيتم كمان استخدام معدات زي المطارق، ومعدات اللحام وأدوات مختلفة لتنفيذ مهام معينة تحت سطح الماية.. والغواص هنا مش هتلاقيه نازل باسطوانات ولكن التفنس بيكون عن طريق السطح يعني هو بيكون شغال تحت وفي إمداد ليه من السطح علشان يقدر يتنفس.
ممكن تدوروا على فيلم وثائقي بعنوان “Last Breath” في شرح رائع للنوع ده من الغوص وهتشوف في الفيلم الغطاسين اللي من النوع ده بيعملوا إيه بالظبط تحت الماية.
الغوص العسكري (Military Diving)
النوع اللي بعد كده هو الغوص العسكري، وده نوع من الغوص الهدف منه القيام بمهام عسكرية، زي مهام الاستطلاع، عمل الأبحاث لخدمة المؤسسات العسكرية، تأمين السفن والموانئ، الهجوم على سفن و موانئ العدو. الغوص الترفيهي استفاد بشكل كبير من الغوص العسكري، والتجاري، لأن النوعين دول من الغوص دايما متوفر ليهم التمويل لعمل أبحاث خاصة بمعدات الغوص، والغازات المستخدمة، وتأثير الغوص على جسم الإنسان، وكل ده ساهم في تطور الغوص الترفيهي.
الغوص العلمي (Scientific Diving)
آخر نوع وهو الغوص العلمي، الغوص يعتبر أداة من الأدوات اللي العلماء بيستخدموها في الأبحاث الخاصة بيهم. الأبحاث الخاصة بدراسة الحياة البحرية، دراسة قاع البحار والمحيطات، البحث في أسباب تلوث البحار وتأثيره على الحياة المائية، وغيرها من الأبحاث الخاصة بالبيئة.
الغوص مجال واسع ومالهوش حدود، وده اللي بيميزه، كل يوم هتلاقي في جديد، كل يوم في أبحاث مختلفة بتظهر عن الحياة المائية، في معدات جديدة بيتم تطويرها، أماكن غوص جديدة بتكتشفها، أنواع جديدة من الأسماك بتسمع عنها، باختصار الغوص متعة مالهاش حدود.
إيه نوع الغوص اللي مهتم تعرف أكتر عنه؟
شاركنا برأيك في التعليقات …
