fbpx
رحلات غوص

نصائح للسباحة مع الدلافين الدوارة

بالنسبة للناس اللى حتروح تتفرج على الدرافيل الدوارة فى شعاب سطايح (بمحمية وادى الجمال ) أو شعاب صمداى (بمرسى علم). أتمنى من حضراتكم نقرأ المقالة دى بعناية ونتفهمها كويس جدا لما بنفذ رحلات سياحية لمشاهدة الدرافيل فى بيئاتها الطبيعية.

الصور المرفقة دى لنوع من الدرافيل أسمة الدرفيل الدوار أو المغزلى Spinner Dolphin وتم تسميتة بهذ الأسم لأن عنده القدرة على القفز فى الهواء والدوران حول محورة حوالي من 6 إلى 7 فى الثانية لفات حول محور تمركزة. النوع ده الوحيد اللى بيتغذى بالليل و بيريح بالنهار, علشان كده ليه أحنا بنشوفة بالنهار متواجد لساعات طويلة داخل منطقة ضحلة زى شعاب سطايح أو شعاب صمداى؟!.

بالنسبة للتغذية, بالليل بيحصل هجرة ليلية للهائمات البحرية الدقيقة من منطقة الميل القارى (أكثر من 1000 متر) إلى منطقة الرصيف القارى (من 200 ألى 300 متر), تيجى الأسماك زى الساردين والكلامارى Squid بتتغذى على هذه الهائمات عند العمق ده, وبالتالى تيجى بدورها الدرافيل الدوارة بالغوص إلى هذا العمق وتتغذى عليها طوال الليل. طب هى بتتغذى أزاى؟ الدرافيل علشان تحافظ على صحتها بشكل كويس محتاجة تتغذى على حوالى 4 Squid فى الدقيقة الواحدة, وعلشان تحقق ده لابد من أن يكون عندها كفاءة فى الصيد يخليها تصطاد العدد ده فى الوقت ده. الموضوع صعب ومجهد ومش سهل خالص. المهم…بعد عناء الصيد طوال الليل, تلجأ الدرافيل الدوارة فى الصباح الباكر وقبل طلوع الشمس إلى أقرب مكان ضحل تقضى فيه فترة الراحة بحيث يكون قريب من منطقة غذاءها. مكان الراحة ده لازم تتوافر فيه شروط مهمة زى أنه يكون ضحل و قاعه رملى علشان أى جسم غريب زى القروش لو دخل جوه سهل جدا يتكشف ويكون آمن ليها ولصغارها, والشروط دى متوفرة فى شعاب سطايح وصمداى.

طيب لما الدرافيل بتدخل تريح ايه اللى بيحصل بعدها؟ الدرافيل بتدخل بسرعتها, وأول ما تدخل إلى أقل منطقة ضحلة بجوار الشعاب بتبدأ تقلل سرعتها ونصف المخ بينام تمام والنص التانى بيظل نشط علشان حاجتين: أولا علشان أستمرار عملية التنفس الأرادية (بعكس الانسان لا أرادية) يعنى لازم الدولفين يكون يقظ ومركز علشان يطلع ياخد أنفاسة, لو محصلش كدة يغرق ويموت. ثانيا علشان يكون حذر لو فى أى خطر أو قرش دخل يقدر بسرعة يتفاداه. المهم فترة الراحة دى بتتراوح تقريبا من 5 إلى 6 ساعات بحيث على وقت الظهر تقريبا بتبدأ الدرافيل تصحى وتنشط وأحنا بنعرف ده عن طريق زيادة الحركات الهوائية المختلفة وأتساع منطقة الحركة وسرعتها.

المراكب اللى بتجرى وراها فى النهار أثناء فترة الراحة بتجهد الدرافيل جدا وبتخليها تهرب وتجري وده بيخليها تبذل طاقة كبيرة كانت مخصصة للراحة أو لرعاية أبناءها وضاعت فى الهروب , وبالتالى عدد ساعات راحتها حيقل الى 3 ساعات مثلا بدلا من 6 ساعات, وبالتالى لما تيجى تصطاد بليل حتصطاد 2 Squid بدلا من 4 لأنها لم تأخذ كفايتها فى الراحة بشكل طبيعى , بالظبط كدة زى حضرتك لما مش بتاخد كفايتك نوم بتروح الشغل تاني يوم وأنت مش مضبوظ ومش حتعرف تشتغل بكفاءه. طب الكلام ده معناه ايه؟ معناه انها مش حتاخد كفايتها من الغذاء والراحة وبالتالى جسمها حيخس أولا: ثانيا مش حتقدر تهرب وتحمى نفسها من خطر القروش أو المراكب, ثالثا لو معاها صغارها مش حيقدروا يهربوا هم كمان, وبالتالى مش حتعرف ترعاهم كويس وحيموتوا كلهم فى النهاية. طبعا على المدى القصير سلوكهم حيتغير, وعلى المدى البعيد حيهجروا المكان وممكن يموتوا.

الخلاصة لحضراتكم أثناء السباحة مع الدرافيل:
——————————————————-
أثناء السباحة مع الدرافيل حتشوفوا أناث حوامل بطنها كبيرة وده ظهر من حوالى كام شهر كده, لكن الجديد انه أبتداءا من شهر يونيو حتى سبتمبر الدرافيل حتبدأ تولد وصغارها حديثى الولادة تقدروا تميزوها من خلال وجود خطوط بيضاء على الجسم ودى آثار الحبل السرى والمشيمة لما كان جنين (فى صورة بتوضح ده) وبنسمية Newborn حديث الولادة, بعدها بحوالى أسبوعين الخطوط دى بتختفى وكده بيبقي أسمه Calf , وبيفضل مع أمه حوالى من سنة ونص علشان الرضاعة وهى كمان بتعلمة كل حاجة. فى الرضاعة الصغير بيقلب نفسة ويغمض عينة وبيرضع من أحد الحلمات على الجانبين, وبعدين بيتجة للجاب الأخر (فى صورة توضح ده).
كمان حتشوفوا وضع التزاوج بين الذكر (أسفل) والأنثى (أعلى) وده بيتم طوال السنة لكن بيزيد عدد مراته أكثر دلوقتى. كمان حتشوفوا أعداد ومجموعات كثيرة علشان الدرافيل بتيجى من كل مكان للولادة وكمان مجموعات ذكور ضخمة علشان تحميها.

مش حطول على حضراتكم, لكن اتمنى من كل واحد يكون حريص على عدم مطاردة الدرافيل, ويقول لريس المركب والبحرى اللى على الزودياك بلاش يجرى وراهم كتير, بس ينزلكم المية قبل الدرافيل بشوية ويبعد وأنتوا عوموا ناحية الدرافيل.

لمزيد من المعلومات برجاء زيارة الصفحة

الوسوم

Ahmed Shawky

عالم الأحياء المائية، وكبير مدربين بمنظمة بادي، حاصل علي ٢ ماجستير عن سلوك الدلافين الدواره من إيطاليا (جامعه بيكوكا - ميلانو) ومصر (جامعه قناه السويس بالاسماعيليه)، كما أنه حاصل علي دكتوراه عن بيئه وسلوك عروس البحر

مقالات ذات صلة

زر الذهاب إلى الأعلى
إغلاق
إغلاق